قصه مثيره

ما سمعتي
وقرب مني وهو بيبص في عيوني بقوه 
انا مش حيوان عشان اعمل كده
ولف خصله من شعري علي صوابعه وهو بيكمل بټهديد 
انا بس حبيت اعرفك مقامك مش اكتر 
عشان تاني مره لما تيجي تتكلمي معايا تتكلمي بحدود سامعاني ياميمو!!!
كنت بتنفس بسرعه وبرمش بعيني وهو قريب مني بالشكل المريب ده 
حسيت دقات قلبي هتوصل للسما من كتر ما هي مضطربه ومتوتره من قربه
عيوني تلقائيا بتروح لاي مكان إلا عيونه اللي لو بصتلها هتحس قد ايه انا متوتره وانا مش عايزاه يحس بتوتري أو أنه مآثر عليا بالشكل ده !!
بعد عني وقام خرج من الاوضه وانا مازلت علي حالتي
منكمشه في نفسي
وقلبي مش عايز يبطل دق
عيوني مش راضيه تبطل ترمش
مشاعري وانا في قربه مش راضيه ترحمني !
وفي الخلفيه صوت الست بتقول
اهرب من قلبي اروح علي فين!
وقتها مكنتش لاقيه اجابه السؤال
من الواضح اني مش هقدر اهرب من قلبي اللي حابب قربه متوتر مكسوف لكن في النهايه حاسس براحه غريبه وكأنه بيقولي مفيش هروب مني أو من ياسين !
نفضت الافكار الغريبه دي من دماغي وقومت من مكاني وانا بتنهد بحيره
خرجت برا الأوضه لقيته قاعد علي الكنبه وماسك الفون بتاعه بس بالرغم من كده حسيته بعيد كل البعد عن الفون كأنه في عالم تاني خاااالص
مهتمتش أو حاولت مهتمش ودخلت الحمام وبعد شويه خرجت لقيته لسه زي ما هو
دخلت الأوضه مره تانيه وقفلت الباب بالمفتاح وغيرت هدومي وسرحت شعري وحطيت ميك اب وكأني عروسه بجد في يوم صباحيتها!!
كنت لابسه بيجامه قطعتين لونها بيبي بلو بنص كم وفردت شعري علي ظهري وحطيت ميك اب رقيق وهادي بالرغم اني مش بحب احطه دايما
بس يمكن المره دي حبيت اعمل كده عشان اثبتله اني بنت وحلوه واقدر اعمل زي ما البنات بتعمل اقدر اخليك تنبهر بيا وبرقتي ودلعي اقدر اتحول من شخصيه ميان المجنونه الطفله العفويه لميان الانسه الكبيره العاقله
اخدت نفس عميق وخرجت من الاوضه لقيته مش موجوده بس عرفت أنه في المطبخ لما سمعت صوت الحلل
حطيت ايدي تحت خدي وانا بسأل بتفكير 
امممم ياتري بيعمل ايه
وكأنه كان عايز يجاوبني في نفس اللحظه لما لقيته خارج من المطبخ وفي أيده فنجان قهوه لكن الغريبه أنه مبصليش ولا حتي عبرني وكأني هواء
دخل البلكونه وقعد فيها وانا مازلت واقفه في مكاني وفاتحه بوقي مصدومه من تصرفاته
روحت قعدت علي الكنبه وفتحت التلفزيون وانا براقبه بطرف عيني بصمت وفضول
فضول !
هو انا من أمتي عندي فضول انا عمري ما كان عندي فضول اعرف شخصيه حد!
اشمعني هو ليه من بين كل البشر هحب ده ليه يوم ما قلبي يدق يدق للشخص الغلط
كنت طول عمري بسال المرتبطين سؤال واحد حبيتي فيه ايه !
كنت بسمع اجابات غريبه اجابات غير منطقيه بالمره 
كنت بسمع أن الأشخاص اللي بيحبوهم فيهم عيوب الدنيا بس بالرغم من ده مش قادرين ياخدوا خطوه البعد !
كنت بستغرب كنت بحاول اقنعهم أن العيوب مش ممكن تتصلح العيوب هتهدم قصه حبكم بس مكنتش بلاقي مبررات
افتكر مره واحده صاحبتي قالتلي جمله مش هنساها 
مفيش حد كامل كل واحد في عيب بس الاهم من كل ده انك تتأقلمي علي العيب ده مش تسيبي الشخص لمجرد عيوبه الحب انك تضحي وهو كمان يضحي 
وقتها وقفت وأنا وبسال نفسي هل هقدر أضحي عشان حد في يوم من الايام 
طب هل هلاقي اللي يضحي عشاني في يوم !
فوقت من شرودي علي صوته وهو قاعد جنبي علي الكنبه وبيسألني بهدوء 
مالك !
اتوترت وانا ببلع ريقي بصعوبه 
م مفيش
هو انتي فعلا بتحبي حد 
بصيتله باستغراب 
وده يفرق معاك في ايه
هز رأسه 
عادي يعني مجرد دردشه
ومدلي أيده وهو بيبتسم 
ايه رأيك لو نبقي صحاب
بعيد عن أي حاجه
رفعت حاجبي بدهشه 
صحاب!!
امممم يعني بما اننا هنعيش مع بعض لمده شهر فليه نعيش مش طايقين بعض لما ممكن نكون صحاب
علي فكره انا مش بكرهك لاني مسبقش واتعاملت معاكي وانتي كمان المفروض متكرهنيش
و و احم ا انا بعتذرلك عن الموقف البايخ اللي حصل امبارح
اتنهدت بهدوء 
حصل خير
سالني بفضول 
ها موافقه نكون صحاب
بصيت لايده الممدوده بتردد وانا ببلع ريقي بتوتر لكن في النهايه مديت ايدي لايده وانا بقول بهمس وتوتر 
موافقه
ابتسم بهدوء وهو
بيضغط علي ايدي اللي كانت في أيده وانا من توتري سحبتها وانا ببتسم بتوتر
ها بقي ياستي اسمه ايه
رديت باستغراب 
هو مين !
غمزلي بعينه 
اللي بتحبيه
بصيت في الأرض وانا بفرك ايدي بتوتر 
م مش بحب حد
رفع حاجبه بشك 
ده بجد 
والله انا مش مرتبطه
ولا عمرك ارتبطي!
هزيت راسي بنفي 
لا
طب ليه
ملقتش الشخص المناسب
اممممممم
بصيتله وانا بسأله بفضول 
وانت
انا ايه 
اللي بتحبها اسمها ايه !
ابتسم وهو بينطق اسمها بكل الحب اللي في الدنيا 
جاسمين
الغيره نهشت قلبي وحاولت معيطش وانا ببتسم 
ربنا يخليكوا لبعض
يارب
سالته بفضول 
وهي عارفه بقي انك اتجوزت !
سند ظهره علي الكنبه وهو بيهز رأسه 
اه
غريبه
ايه هي اللي غريبه 
غريبه يعني أنها موافقه اصل انا لو مكانها مش هوافق ابدا
سالني بفضول وهو بيبص في عيني 
ليه !
بعدت عيوني عنه وانا بفرك ايدي بتوتر 
ا اصل ي يعني ا اصل انا لما احب واحد مش هسمح ان حد يشاركني فيه حتي لو كانت لعبه
ضم شفايفه في بعض بحيره وهو بيبصلي 
هو انا ممكن أسألك سؤال 
هزيت راسي 
اكيد طبعا
هو انتي اسمك ايه 
بصيتله باستغراب 
نعم !
اتنهد بحزن 
يعني اقصد اسم الدلع بتاعك ايه
رديت بتلقائية 
جاسمين
ابتسم بخبث 
يبقي انتي رديتي علي سؤالي
وقرب مني وهو بيهمس في ودني 
مفيش حد مشارك جاسمين في حبيبها غير جاسمين نفسها
في الدنيا مفيش ابدا ابدا احلي من الحب 
نغلب نتعب نشتكي منه لكن بنحب !
كان صوت الست بيجوب المكان وانا واقفه في المطبخ بعمل اكل وبميل بكل رقه ودلال وانا بدندن مع الاغنيه
كنت حاسه اني طايره في السما حاسه اني واحده جديده خالص واحده عرفت معني الحب اللي بجد
حبيبي سرحان في ايه
لفيت وانا علي وشي ابتسامه كلها حب 
فيك
حط أيده علي قلبه وهو بيقول بهزار 
الحقوناااا الحقونااا بجد
ههههههههههه
قرب مني وحضني وباس راسي بحب 
وحشتيني
سندت راسي علي صدره وانا بغمض عيني بشم ريحه البرفيوم بتاعته اللي أصبحت مؤخرا بعشقها زي ما بعشقه 
وانت كمان اوي
وحطيت أيده علي بطني وانا بقول بحب 
وحشتني يابابي
ضحك واخدني في حضنه وانا ابتسمت برقه وانا بفتكر اللي حصل من شهرين بالتقريب
فلاش بااك 
نعم ا ا أن ا انت بتحبني !
هز رأسه وهو بيبص في عيوني بحب 
ايوه بحبك
طب ازاي !
ميان انا مش ابن عمك
رديت پصدمه 
نعمممممم !!!!
انا جارك اللي عايش في العماره اللي في وشك من سنه وانتي مش واخده بالك منه
جاري مين انت بتتكلم بجد ولا بتهزر
انا مش بهزر ياميان انا جيت المنطقه من سنه واول حد اشوفه هو انتي
شوفتك بتلعبي كالعاده مع أطفال الشارع
وضحك وهو بيفتكر 
اول ما شوفتك استغربت قولت ازاي بنت كبيره وعاقله تقف تلعب مع شويه أطفال
شدتيني ليكي وقفت مكاني اراقبك واراقب موهبتك في اللعب اللي مكانتش موجوده من الاساس لحد ما خلصتي لعب وكسرتي نص قهوه عم محمد ووقعتي نص بضاعه الست بتاعه الصابون وضړبتي دماغ خمسين شخص واقفين
طلعت شقتي وبليل كنت واقف في البلكونه اتفاجئت لما شوفتك واقفه في البلكونه اللي في وشي علي طول بتكلمي ساره صاحبتك وبتصيحي